रविको नागरिकताबारे सांसद चौरसियाले कुरा उठाएपछि संसदमा चर्काचर्की
काठमाडौं, जेठ १०
राष्ट्रिय स्वतन्त्र पार्टीका सभापतिसमेत रहेका प्रतिनिधि सभा सदस्य रवि लामिछाने दोस्रो पटक निर्वाचित भएर आए पनि दोहोरो राहदानी र नक्कली नागरिकताको विषयले भने अझै पनि तनाव झेलिरहेका छन्।
सांसद् लामिछानेले नेपालको कानुनले अपराध भनेको विषय दोहोरो नागरिकता राखेको कुरा उठेपछि उनै संसद्मै आक्रोशित बनेका छन्। उनले नेपाली नागरिकता त्यागेको अवस्थामा त्यागेको नागरिकताबाट नै दल दर्ता गरी सांसद भएको भन्दै अदालतले गैरकानुनी काम गरेको ठहर गरेपछि यसअघि उनको गृहमन्त्री र सांसद पद नै गुमेर चितवनमा उपनिर्वाचन भएको थियो।
हाल फेरि उनले दोहोरो राहदानी प्रयोग गरेको विषय उठिरहेको छ। फेरि सांसद पद गुम्ने भयका कारण उनी संसद्मै आक्रोशित भएका छन्। यससँगै सभापति लामिछानेका विश्वासपात्रसमेत रहेका रास्वापाका महामन्त्री मुकुल ढकाल र उपसभापति डीपी अर्यालले समानुपातिक सांसद बनाउन तीन करोड घुस लिएको विषयले उनलाई थप तनाव दिइरहेको छ।
यसअघि मन्त्री बन्नका लागि रास्वपाका नेताहरुले दुई करोड मागेको भन्ने अडियो बाहिरिएपछि पदबाट निलम्बिन भएका ढाकाकुमार श्रेष्ठले सांसद बन्नका लागि मुकुल र डीपीलाई तीन करोड दिएको बताएका छन्।
यही विषयलाई कांग्रेसका सांसद अजयकुमार चौरसियाले संसद्मा उठाएका थिए। कांग्रेस सांसद चौरसियाले लोकतन्त्रको लागि आजीवन लडेका नेता र पार्टीहरूलाई होच्याउने तथा व्यंगवाण गर्ने गरी बोलिएको भन्ने आपत्ति जनाएका थिए। संसद्मा त्यसरी दलका नेताहरूलाई होच्याएकोमा आफ्नो आपत्ति रहेको पनि उनले बताएका हुन्।
उनले त्यसपछि सभामुखमार्फत प्रधानमन्त्री पुष्पकमल दाहाललाई प्रश्न गरेका थिए। ‘म सोध्न चाहन्छु सम्माननीय सभामुखमार्फत सम्माननीय प्रधानमन्त्रीसँग र सम्बन्धित व्यक्तिहरूसँग, उहाँहरूमाथि लागेको आरोपहरूको बारेमा उहाँहरूले के भन्नुहुन्छ ? सरकारले के गरिरहेको छ ?’
त्यसपछि सांसद चौरसियाले आफ्नो प्रश्नलाई थप प्रस्ट गरे, ‘कुनै सांसद, पूर्वसांसदले कुनै पार्टीको नेतालाई समानुपातिक सांसद बन्नका लागि पैसा दिएको भन्ने आरोप लाग्यो भन्ने छ । जसरी नागरिकता बदर भएर, बाहिरको नागरिकता त्यागेको निस्सा पेस नगरीकन पुनः नागरकिता लिने काम गरियो भन्ने मैले सुनेको छु… ।’ चौरसियाले यति भनेपछि रास्वपाका सांसदहरूले टेबुल ठोक्न सुरु गरेका थिए ।
सांसद चौरसियाले कुनै सांसदको नाम उल्लेख नगरे पनि रास्वपाका सांसदहरूले आफ्नो पार्टी र सभापति रवि लामिछानेलाई भनेको ठानेर सिटबाट उभिएर विरोध जनाएका हुन्।
रास्वपाका सांसदहरू सिटबाट उभिएपछि सभामुख देवराज घिमिरेले रवि लामिछानेलाई बोल्नका लागि समय दिए। सांसद चौरसियाले बोलेका कुरा आफ्नै लागि हुन् भन्ने प्रस्ट पार्दै लामिछानेले भने, ‘सम्मानित अदालतमा भएको विषयलाई रोष्ट्रममा उभिएर माननीयज्यूले के-कुरा गर्न खोज्नुभएको हो ? यो सम्मानित अदालतको अपमान हो कि अथवा उहाँले सुनेका भरमा भन्नुभएको हो कि ? मेरो निस्सा तपाईंलाई बुझाउनुपर्ने हो?’
लामिछानेले समाचारमा आएका विषय संसद्मा उठाउने हो भने आफूले पनि उठाउन तयार रहेको चेतावनी पनि दिए। ‘हल्लाका भारमा लेखिएको समाचारको हेडलाइनको विषयलाई लिएर संसद्मा कुराकानी उठाउनु भयो भने त्यस्ता कुराहरू यति धेरै हुन्छन् कि यो संसद्मा त्यै मात्रै कुराकानी गरे हुन्छ । तपाईंले आफ्ना कुरा राख्नु होला, आफ्ना विषय राख्नुहोला,’ उनले भने, ‘हल्लाका भरमा, सुनेका भरमा आरोप लगाएर संसद्को रोष्ट्रममा यस्तो कुरा गर्ने हो भने यो संसद्को गरिमा कहाँ पुग्छ ?’
कांग्रेस सांसद चौरसियाले बोलेको कुरा संसद्को रेकर्डबाट हटाउन लामिछानेले माग गरे। उनले त्यसो भनिरहेका बेला चौरसिया भने रोष्ट्रममा उभिइरहेका थिए।
लामिछानेले त्यसो भनेपछि कांग्रेसका सांसदलाई आरोप लगाउँदै भने, ‘तपाईंहरूजस्तो हामी मान्छे लुकाएर, बचाएर बस्दैनौं । प्रमाणित गर्नुहोला, यो संसद्को पाँच किलोमिटर वरपर हामी देखिँदैनौं। आफ्नो अनुहार लुकाएर हिँड्छौं, हामी आफै। हल्लाका भरमा, मिडियाले लेखेको र सेयर गरेको भरमा यो संसद्मा आएर बोल्न पाइँदैन।’
लामिछाने बोलिरहँदा रास्वपाका सांसद डीपी अर्याल छेउमा उभिएका थिए। एक जना सांसद बोलिरहेको बेला अर्को सांसद उभिन नहुने संसदीय अभ्यास रहेकोमा अर्यालले भने त्यसको ख्याल गरेका थिएनन्। उनी टोलाएर उभिरहेका थिए। त्यसपछि सभामुखले उक्त कुराप्रति आफ्नो ध्यानाकर्षण भएको जानकारी गराए। लामिछाने पनि बसे। चौरसियाले आफ्नो भनाइलाई पुनः सुरु गरे ।
‘मधेसमा नागरिकता हुन्छ । नागरिकता मुद्दा हुँदा थुनामा बस्नुपर्ने हुन्छ । दोहोरो नागरिकता हुँदा थुनामा बस्नुपर्ने हुन्छ,’ चौरसियाले थपे, ‘तर, यहाँ के गरिएको थियो ? म सम्माननीय प्रधानमन्त्रीजीसँग जान्न चाहन्छ । मेरो हक पनि हो यो कुरा सोध्ने । एउटा सामान्य मान्छेको सहयोगीले सुसाइड नोट लेख्यो र त्यो सुसाइड नोटमा दोषी देखियो भने त्यसलाई के हुन्छ ? सबै नागरिकलाई नेपालको कानुनअनुसार समान व्यवहार सरकारले गर्नुपर्छ । पुरानै नागरिकता नम्बर दिएको छ । पुरानै जारी मिति राखिएको कुरा पनि गरिएको छ । यो ठीक हो कि होइन ? कानुनसम्मत हो कि होइन ? कसैले विरोध गर्दैमा मेरो सूचनाको हक कायमै रहन्छ… ।’
सांसद चौरसियाले फेरि लामिछानेलाई इंगित गरेर अन्य विषय पनि उठान गर्न थालेपछि रास्वपाका सांसदहरू सिटबाट उभिए। टेबुल ठोके । सभामुख घिमिरेले आफ्नो ध्यानाकर्षण भएको भन्दै बस्न आग्रह गरे। कांग्रेस सांसदहरूले पनि ‘निरंकुशता चल्छ’ भन्दै टेबुल ठोकेर उभिए।
सभामुख घिमिरेले भने समय लिएर बोल्न र संसद्को मर्यादालाई ख्याल गर्न आग्रह गरेका थिए। यो बेला रास्वपा र कांग्रेस सांसद उभिएर एक-अर्काविरुद्ध बोलेका थिए।
रविले आफ्नो विषयलाई अदालत र समाचारका हेडलाइनलाई सम्झाए पनि यसअघि आफूले पनि समाचारका हेडलाइन हेरेरै संसद्मा बोल्ने गरेको भने बिर्सिए। यसअघि रास्वपाका सांसद्हरुले समाचारमा आएका हेडलाइनकै विषयलाई लिएर कांग्रेस सांसद् आरजु राणामाथि प्रश्न गरेका थिए। त्यसैगरी अदालतमा विचाराधिन भएको विषय नक्कली भुटानी शरणार्थी प्रकरणमा पनि रास्वपाका सांसद्हरु बोल्न छोडेका छैनन्। तर, आफ्ना गलत कर्तुतहरु खुल्ने भयले भने उनीहरुले जायज कुरामा पनि विरोध गरिरहेका छन्। न त रवि लामिछानेले यसअघि जस्तो सांसद बनाउन तीन करोड बुझाएको विषयमा स्पष्टीकरण नै दिन सकेका छन्।
प्रकाशित मिति: १० जेष्ठ २०८०, बुधबार
