सुदूर पहाडमा जात्राको रौनक (मेलौलीको फोटो फिचर)
बैतडी, कात्तिक २८
सुदूरपश्चिमको पहाडी जिल्लाहरुका विभिन्न मन्दिरहरुमा आजबाट दुईदिने मेला तथा जात्रा सुरु भएका छन् ।
बैतडीको तल्लो स्वराडमा रहेको प्रसिद्ध धार्मिक स्थल मेलौली भगवती मन्दिर ,
राष्ट्रैकै सातौं धाम मानिएको दार्चुलाको मालिकार्जुन मन्दिर, डडेल्धुरामा रहेको उग्रतारा मन्दिर र डोटी जिल्लाको प्रसिद्ध गगुडा लाटामष्टा मन्दिरमा आइतबारदेखि विशेष पूजाआजासहित जात्रा सुरु भएको हो ।
प्रसिद्ध शक्तिपीठका रुपमा रहेको मेलौली भगवती मन्दिरमा हरेक वर्ष कात्तिक शुक्ल चतुर्दशी र पूर्णिमाका दिन जात्रा तथा पूजाआजा हुँदै आएको छ ।
सो मेलामा तल्लो सोराड क्षेत्रका बासिन्दाका साथै भारतको उत्तराखण्डका पिथौरागढ, चम्पावत लगायतकाजिल्लाबाट पनि आउने दर्शनार्थीले राँगा तथा बोकाको बलिसहित पूजाआजा गर्ने गर्छन् ।
यस्तै रौलेश्वरमा रहेको भवानी मन्दिरमा पनि आइतबारदेखि जात्रा सुरु भएको छ ।
प्रत्येक वर्षको कात्तिक शुक्ल चतुर्दशी र पूर्णिमाका दिन मेला लाग्ने सो मन्दिरमा पनि राँगा तथा बोकाको बलिदिने चलन रहिआएको छ ।
मेलालाई मर्यादित बनाउनका लागि मेलास्थललाई मदिरा निषेधित क्षेत्र घोषणा गरिएको छ भने मेलामा चोरी तथा आपराधिक घटना हुननदिन प्रहरी परिचालन गरिएको जिल्ला प्रहरी कार्यालयले जनाएको छ ।
यस्तै राष्ट्रैकै सातौ धाम मानिएको दार्चुलाको मालिकार्जुनमा आइतबारदेखि विशेष पूजाआजासहित मेला सुरु भएको छ ।
यसरी लाग्ने मेलामा हजारौंको सँख्यामा दर्शानार्थीहरुको उपस्थिति रहेको हुन्छ ।
प्रकाशित मिति: २८ कार्तिक २०७३, आइतबार
