पिएसजीको पहिलो जीत

पेरिस, असोज १ एजेन्सी

इन्ज्युरी समयमा जुलियन ड्राक्सलरको गोल गरेपछि साविकको विजेता पेरिस सेन्ट जर्मेन पीएसजीले फ्रेन्च लिग वानमा तीन खेलपछि पहिलो सफलता हात पारेको छ ।

१० खेलाडीमा समेटिएको पीएसजीले मेट्जमाथि १–० को झिनो जित हात पारेको हो ।

स्टार खेलाडीहरु कोरोना संक्रमण र प्रतिबन्धका कारण टोलीमा नरहँदा पीएसजीले मेटेजमाथि जित निकाल्न निकै संघर्ष गर्नुपरेको थियो । पीएसजी यसअघिको सुरुवाती दुई खेलमा यसै सिजन बढुवा भएको लेन्स र मार्सेसँग समान १–० ले पराजित भएको थियो ।

पार्क डि प्रिन्सेस पेरिसमा बल पोजेसनमा ७१ प्रतिशत बल पोजेसन राखेपनि पीएसजीले गोलको लागि निकै नै संघर्ष गर्नुपरेको थियो । ११औं मिनेटमा एन्जल डि मारियाको क्रसमा मोउरो इकार्डीको हेडर पोस्टबाट थोरै बाहिरियो । लगत्तै १२औं मिनेटमा पाब्लो सारावियाको प्रहारलाई मेट्जका गोलरक्षक एलेसान्द्रे ओकिडजाले बचाए ।

३२औं मिनेटमा डि मारियाकै क्रसमा इकाडीको प्रहार पोस्टबाट थोर बाहिरिदा पीएसजी अग्रता लिनबाट चुक्यो । ३८औं मिनेटमा इब्राहिमा निएनले सुन्दर अवसर पाएपनि सदुपयोग गर्न नसक्दा मेट्ज अग्रता लिनबाट चुक्यो ।

६५औं मिनेटमा १० खेलाडीमा समेटिएपनि पीएसजीले बल पोजेसनमा पकड कायमै राख्यो । मेट्जका पीएसजीका इब्राहिमा निएनलाई फल गरेपछि पीएसजीका एब्डोउ डिएलो दोहोरो पहेँलो कार्ड खादै मैदानबाट बाहिरिए । ६९औं मिनेटमा डि मारियाको पासमा ओभरल्यापमा अघि पुगेका कोलिन डग्वाले क्रस गरेको बललाई पेनाल्टी बक्स नजिकै डि मारिया हेडर प्रयास गरेपनि पोस्टका दिशा लिन सकेन ।

७६औं मिनेटमा जुलियन ड्राक्सलरको पासमा इकार्डीको अर्को प्रहारमा गोलरक्षक बाधक बने । ७८औं मिनेटमा मेट्जका गोलरक्षकले उत्कृष्ट बचाउ गरेपछि पीएसजी अग्रता लिनबाट चुक्यो । इकार्डीको ब्याकहिल पासमा डि मारियाको प्रहारलाई मेट्जका गोलरक्षकले विफल पारेका थिए ।

इन्ज्युरी समयको थप गरिएको तेस्रो मिनेटमा ड्राक्सलरले गोल गर्दै पीएसजीलाई महत्वपुर्ण तीन अंक दिलाए । डि मारियाले क्रस गरेको बललाई इकार्डीले भेट्न नसकेको अवस्थामा मेट्जका गोलरक्षकले विफल पारेपनि रिवाउन्डमा ड्राक्सलरले हेडरमार्फत खाली पोस्टमा जाली चुमाएका थिए ।

यस जितसँगै सुरुवाती दुई खेलमा अंक गुमाएको पीएसजीले लिग वानमा पहिलो अंक जोडेको छ । मेट्ज अझै अंकविहीन छ ।