सरकारकाे पछिल्लाे नियुक्तिप्रति प्रचण्डकाे असन्तुष्टि
काठमाडौं, भदाैँ ४
नेपाल कम्युनिस्ट पार्टी (नेकपा) का अध्यक्ष पुष्पकमल दाहाल ‘प्रचण्ड’ले सरकारका पछिल्ला नियुक्तिप्रति असन्तुष्टि जनाएका छन् । बिहीबार प्रधानमन्त्री केपी शर्मा ओलीसँगको भेटेमा प्रचण्डले नेकपा विवाद समाधानका लागि कार्यदल गठन भएयता सरकारले गरेका नियुक्तिप्रति असन्तुष्टि जनाएका हुन् । भेटमा प्रचण्डले पछिल्ला नियुक्ति खारेज गर्न ओलीसँग माग पनि गरेका छन् ।
प्रचण्ड निकट स्रोतले भन्यो ‘अध्यक्ष कमरेडले आजको भेटमा पछिल्लो पटक जे जस्ता राजनीतिक नियक्तिहरु भएका छन् । ति सबै खारेज गर्नुस् भन्नुभएको जानकारी पाएको छु । विशेषगरी अध्यक्षले सोमबारको मन्त्रिपरिषद्को निर्णयप्रति असन्तुष्टि जनाउनु भएको हो’,।
तर, प्रधानमन्त्री ओलीले भने कार्यदल गठनअघि नै ती नियुक्तिहरु प्रक्रियामा रहेका र निर्णयहरु गरिएको जवाफ दिएका छन् । सोमबार बसेको मन्त्रिपरिषद् बैठकले युवा तथा साना व्यवसायी स्वरोजगार कोषमा कल्याण रोका र प्रेस काउन्सिलको कार्यवाहक अध्यक्षमा दुर्गा भण्डारीलाई नियुक्त गर्ने निर्णय गरेको थियो। यद्यपि भण्डारीलाई कार्यवाहक अध्यक्षका रुपमा काम नगराउन सर्वोच्च अदालतले आदेश दिइसकेको छ । त्यस्तै सरकालले तीन देशका राजदुत पनि नियुक्त गरेको थियो। यिनै नियुक्तिमा दाहालले असन्तुष्टि जनाएका हुन् ।
प्रकाशित मिति: ४ भाद्र २०७७, बिहिबार
