कुशको शव बनाएर पूर्वगृहमन्त्री घिमिरेको अन्त्येष्टी
काठमाडाैं, असाेज १४
६ दिनअघि चितवनको दारेचोक गाविसमा पर्ने घोप्टेभीरबाट गाडिसहित त्रिशुली नदीमा हराइरहेका पूर्व गृहमन्त्री माधव घिमिरे र उनका भाइ प्रकाश घिमिरेको कुशको शव बनाएर अन्त्येष्टी गरिएको छ । एक सातासम्मको खोजीपछि पनि नभेटिएपछि परिवारले उनको निधन भएको विश्वास गरी कुशको प्रतिरुप बनाएर अन्तिम संस्कार सुुरु गरेका छन् ।
सो दुर्घटनामा निधन भएकी घिमिरेकी आमा चैतन्यकुमारीको शवसँगै छोराहरुको पनि दाहसंकार गरिएको हो । चैतन्यकुमारीको शवमा नाती तथा घिमिरेका छोराले दागबत्ती दिए । पशुपति आर्यघाटमा हिन्दू परम्पराअनुसार गरिएको अन्तिम संस्कारमा गृहमन्त्री बिमलेन्द्र निधी, मुख्यसचिव सोमलाल सुवेदी लगायत सरकारी अधिकारीहरुको उपस्थिति थियो ।
गत आइतबार मुक्तिनाथमा बुबाको श्राद्ध गरी फर्कने क्रममा घिमिरे चढेको गाडी घोप्टेभीरबाट त्रिशुलीमा खसेको थियो । दुर्घटनामा मृत्यु भएका तीन जनाको शव भेटिएको थियो भने पूर्वगृहमन्त्री घिमिरेसहित ३ जना अझै हराइरहेका छन् ।
प्रकाशित मिति: १४ आश्विन २०७३, शुक्रबार
