देशभर ८१ हजार ६ सय बढीमा कोरोना परीक्षण

काठमाडौं, बैशाख ३१
नेपालमा कोरोनाको आशंकामा हालसम्म ८१ हजार ६ सय ५९ जनाको कोरोना परीक्षण भएको स्वास्थ्य तथा जनसंख्या मन्त्रालयले जनाएको छ।

कोरोनाको आशंकामा पछिल्लो २४ घण्टामा २ हजार ३ सय ५७ जनाको पिसिआरबाट नमूना परीक्षण भएको छ। २१ हजार ३ सय ४० जनाको पिसिआर र ६० हजार ३ सय १९ जनाको आरडिटिबाट परीक्षण भएको मन्त्रालयका प्रवक्ता डा विकास देवकोटाले बताए।

कोरोनाको आशंका र संक्रमित गरी २ सय ४५ जना अस्पतालको आइसोलेसनमा भर्ना भई उपचाररत रहेको प्रवक्ता देवकोटाले बताए। जसमध्ये ६ जना काठमाडौं उपत्यकामा छन्। मुलुकभर हाल १४ हजार ३ सय १३ जनालाई क्वारेन्टाइनमा राखिएको मन्त्रालयले जनाएको छ।

कुल संक्रमित २ सय १९ मध्ये हालसम्म ३५ जना उपचारपछि डिस्जार्च भएका छन्। संक्रमितमध्ये १ सय ७६ पुरुष र ४३ जना महिला छन्। संक्रमित सबैको स्वास्थ्य अवस्था सामान्य रहेको मन्त्रालयले जनाएको छ।