कोरोना भाइरसबिरुद्द उपचारमा खटिएका चिकित्सकको मृत्यु
नयाँदिल्ली, चैत्र २७
भारतमा दिन प्रतिदिन कोरोना भाइरसको संक्रमण फैलिरहेको बेला मध्यप्रदेशमा कोरोना भाइरस संक्रमणबाट एक चिकित्सकको मृत्यु भएको छ ।
६२ वर्षीय चिकित्सक सत्रुघन पञ्जवानीको मृत्यु भएको हो । कोरोना संक्रमितको उपचारमा खटिने क्रममा मृत्यु हुने सत्रुघन पहिलो भारतीय चिकित्सक रहेको भारतीय संचारमाध्यमहरुले जनाएका छन्।
भारतमा यसअघि अन्य चिकित्सक र नर्सहरु पनि कोरोना संक्रमित भइसकेका छन् । भारतमा संक्रमितको संख्या ५ हजार ७ सय भन्दा धेरै पुगिसकेको छ भने १ सय ६६ को मृत्यु भइसकेको छ । संक्रमितको संख्या बढ्न थालेपछि प्रधानमन्त्री नरेन्द्र मोदीले आगामी साताबाट सकिने लकडाउनलाई फेरी बढाउने संकेत गरेका छन्।
प्रकाशित मिति: २७ चैत्र २०७६, बिहिबार
