नेपाल–भारत सहमति : जो जहाँ छन् त्यहीँ व्यवस्थापन

काठमाडाैँ, चैत्र १९
नेपाल र भारतबीच सीमा नाका बन्दसँगै देशभित्र यति बेला लकडाउनको अवस्था छ । कोरोना भाइरस सङ्क्रमण फैलन नदिन भारतले पनि २१ दिने लकडाउन घोषणा गरेको छ । घोषणाकै क्रममा भारतका विभिन्न क्षेत्रबाट नेपाल फर्कंदै गरेका केही नेपाली नागरिक अझै पनि सीमापारि अलपत्र छन् भने कतिपय भारतीय नागरिक पनि भारत जान सिमानामा बसेका छन् ।

विश्व स्वास्थ्य सङ्गठनको मान्यताअनुसार जो जहाँ छन्, त्यहीँको सरकारले व्यवस्थापन गर्नुपर्ने हुन्छ । “त्यहीअनुसार नै सीमापार रहेकालाई भारत सरकारले हेर्ने र वारि रहेका भारतीयसमेतलाई नेपाल सरकारले व्यवस्थापन गर्ने उच्चस्तरीय सहमति भएको छ”, प्रधानमन्त्रीका परराष्ट्र सल्लाहकार डा. राजन भट्टराईले भने। उनका अनुसार माथिल्लो तहमा र स्थानीय तहमा कुराकानी भएको छ । यसअनुसार सीमापार रहेका नेपालीलाई भारत सरकारले व्यवस्था गर्ने र नेपालमा रहेका भारतीयलाई नेपाल सरकारले हेर्नेछ ।

घरभित्रै रहने र बाहिर ननिस्कने सरकारको कडा निर्देशनअनुसार दुवै देशका नागरिक घरभित्रै छन् । जथाभावी सीमा खुला गर्दा र नागरिक आवतजावतलाई बढावा दिँदा कोरोना सङ्क्रमणको जोखिम उच्च रहने भएकाले सीमा नखोल्ने र जहाँ छन् त्यहीँ व्यवस्थापन गर्ने रणनीति अपनाइएको गृह मन्त्रालयका प्रवक्ता केदारनाथ शर्माले जानकारी दिए। नेपालभित्र रहेकालाई शुक्रबारदेखि नै क्वारेन्टाइनमा राखिएको छ । पारि रहेकाको हकमा भारत सरकारले नै व्यवस्थापन गर्ने भनिए पनि हालसम्म नेपालकै तर्फबाट खानपानमा सहयोग भइरहेको छ । गोरखापत्र दैनिकमा खबर छ ।