प्रदेश ५ को स्थायी राजधानीका लागि अंक गणितीय हिसाब

बुटवल, फगुन २६
प्रदेश ५ मा सरकार र सदन स्थापना भएको दुइ वर्ष नाघिसक्दा यहाँका मुख्यमन्त्री शंकर पोखरेललाई आफनै पार्टीका सांसदले प्रदेशको नाम र राजधानीको विषय अल्झाएको र मन्त्रिपरिषद्लाई पूर्णता दिन नसकेको आरोप लगाउँदै आएका छन्। पछिल्लोसमय नाम र स्थायी राजधानीको विषय टुंग्याउन दबाब बढेसँगै मुख्यमन्त्रीले मन्त्रिपरिषद् विस्तारको तयारी भने थालेका छन्।

यो प्रदेशमा ८७ जना सांसद छन्। नेकपाका ६१, कांग्रेसका १९, संघीय समाजवादी फोरमका ५, राष्ट्रिय जनमोर्चा र राजपाका १÷१ जना हुन्। प्रदेशको नाम र स्थायी राजधानीका लागि दुईतिहाइ अर्थात् ५८ मत चाहिन्छ। साविकको लुम्बिनीको मत नबाँडिए ५२ जना बुटवल पक्षधर हुन्। दाङ पक्षधरको संख्या ३५ छ।

सबैभन्दा धेरै रुपन्देहीमा १९,कपिलवस्तुमा १२, नवलपरासी ५,पाल्पा ७, अर्घाखाँची ४, गुल्मीबाट ५ जना सांसद छन्। त्यस्तै दाङ १०, प्युठान ३, रोल्पा २, रुकुमपूर्व ३, बाँके ९ र बर्दियाबाट ८ जना सांसद छन्। सामरिक, सांस्कृतिक, यातायात, पूर्वाधार, जनसंख्या र भौगोलिक रूपमा बुटवल नै उपयुक्त रहेको तर्क बुटवल पक्षधरको छ। भौगोलिक रूपमा पायक पर्ने भएकाले दाङ उपयुक्त हुने तर्क दाङ पक्षधरको छ।