कांग्रेसमा विभाग गठन : पौडेल समूह असन्तुष्ट

काठमाडौं, फागुन १८
नियमित कार्यकाल सकिनु दुई दिनअघि सभापति शेरबहादुर देउवाले विभाग गठन गरेका छन्। उनले शनिबार एक दर्जन विभागमा प्रमुख मनोनीत गरेका हुन्। ४७ मध्ये १३ विभागमा प्रमुख मनोनीत गरिएको छ।

पार्टी विधानअनुसार महाधिवेशनको दुई महिनाभित्र विभाग गठन गरिसक्नुपर्छ। संगठन विभागमा गोपालमान श्रेष्ठ, संघीय मामिला तथा प्रदेश समन्वयमा रमेश रिजाल, मुस्लिममा फरमुल्लाह मन्सुर र स्थानीय तह समन्वयमा अर्जुनप्रसाद जोशी मनोनीत भएका छन्।

सभापति देउवाले वित्तीय तथा सहकारी संस्था समन्वयमा आनन्दप्रसाद ढुंगाना, तराई–मधेस समन्वयमा अजयकुमार चौरसिया, यातायात व्यवसायी समन्वयमा महेन्द्र यादव, तरुणमा शंकर भण्डारीलाई जिम्मेवारी तोकेका छन्।

आदिवासी जनजातिमा सीता गुरुङ, नेपाली जनसम्पर्क समिति समन्वयमा गोविन्द भट्टराई, उद्योग व्यापारमा चीनकाजी श्रेष्ठ, सूचना, सञ्चार तथा प्रचारमा प्रवक्ता विश्वप्रकाश शर्मा र श्रमिक तथा ट्रेड युनियनमा शिवप्रसाद हुमागाईंलाई जिम्मेवारी दिइएको छ। १३ विभाग प्रमुखमध्ये १२ जना सभापति देउवा निकट हुन् भने हुमागाईं कृष्णप्रसाद सिटौला निकट मानिन्छन्।

कांग्रेस केन्द्रीय कार्यसमितिको चारवर्षे कार्यकाल फागुन १९ गते सकिँदै छ। पार्टीले अर्को वर्ष फागुन ७ देखि १० गतेभित्र केन्द्रीय महाधिवेशन गर्ने गरी एक वर्ष कार्यकाल थप्ने निर्णय यसअघि नै गरिसकेको छ।

सभापति देउवा बाँकी विभाग पनि चाँडै गठन गर्ने तयारीमा छन्। उनले शुक्रबार वरिष्ठ नेता रामचन्द्र पौडेललाई टेलिफोनमार्फत विभागमा बस्ने नेताहरूको नाम दिन आग्रह गरेका थिए। तर नेता पौडेलले कार्यकालको अन्तिममा विभाग गठनको औचित्य नरहेको भन्दै नाम नदिने जवाफ दिएका थिए।

पौडेलनिकट नेता प्रकाशमान सिंहले विभाग गठनप्रति असहमति जनाएका छन्। उनले १४ औं महाधिवेशनलाई प्रभावित गर्ने गरी कार्यकालको अन्तिममा विभाग गरिएको भन्दै असन्तुष्टि जनाए।

‘पार्टीको महाधिवेशनको मिति तोकिइसकेपछि आचारसंहिता लागू भइसकेको छ। यो त महाधिवेशनलाई प्रभावित गर्ने नियतले गर्नुभएको छ,’ नेता सिंहले भने, ‘१३ औं महाधिवेशन सकिएको दुई महिनाभित्र गठन गर्नुपर्ने हो। विधानले निर्देशित गरेका कार्य गर्न र संगठनलाई पूर्णता दिन हामीले बारम्बार भन्दै आएका हौं। उहाँले त्यो गर्नुभएन।’

पाँच आमन्त्रित सदस्य थप
सभापति देउवाले पाँच आमन्त्रित सदस्य पनि मनोनीत गरेका छन्। मनोनीत हुनेमा कृष्णकिशोर घिमिरे (दाङ), गोपालकुमार बस्नेत (झापा), सुधीरकुमार शिवाकोटी (झापा), मनोहरनारायण श्रेष्ठ (धनकुटा) र ध्रुव वाग्ले (तनहुँ) छन्। आजको अन्नपूर्ण पोष्टबाट